حاضیرلایان: ائلدار م. صدیق
یۆکسک منصبلی بیر شخص زاهید دن سوروشدو:«ـ آداملار فیلان عابیدین دالینجا پیس دانیشیرلار، سن اونون حاققیندا نه دئیه بیلرسن؟»
دئدی:«ـ ظاهیرینده عئیب گؤرمۆرم. باطینینه ایسه بلد دگیلم.»
شئعر
حؤرمت ائت، هر زامان، یاخشی آدام بیل،
هر کیمی چوخ ساده گئیینمیش گؤرسن.
باطینی درک ائتمک بیر مشکل ایشدیر،
دارغا تک هر ائوه داخیل اولما سن!
حاضیرلایان: ائلدار م. صدیق
بیر شاهزادا حاققیندا ائشیتمیشم کی، اۆزۆ چیرکین و قیسسا بویلو، قارداشلاری ایسه گؤزه‌ل و اوجا ایدی. بیر دفعه شاه اونا آلچاق نظرله باخیب اعتناسیزلیق گؤستردی. اوغلان حساس ایدی، باشا دۆشدۆ و دئدی:
«ـ آتا، عاغیللی گؤده‌ک، آخماق اوزوندان یاخشی‌دیر. هر قامتی اوجا اولانین قیمتی باها اولماز. قویون کیچیک اولسادا تمیز، فیل بؤیۆک اولسادا مورداردیر.»
شئعر
چوخ آلچاق اولسادا طور داغی بی‌شک،
آللاه درگاهیندا ساییلیر یۆکسک.
حاضیرلایان: ائلدار م. صدیق
خراسان حاکیملریندن بیری یوخودا گؤردۆ کی، محمود سبکتکین ـ‌ین بۆتۆن بدنی چۆرۆیۆب تورپاغا قاریشمیش. لاکین گؤزلری هله‌ده اؤز حدقه‌سینده هرله‌نیر و اطرافا باخیر.
بۆتۆن عالیملر بو یوخونو یوزماقدا عاجیز قالدیلار. آنجاق اورادا اولان درویشلردن بیری باش اگیب دئدی:«ـ گؤزلری حسرت چکیر، آخی، اؤلکه‌سی الدن ـ اله کئچیر.»
شئعر
چوخ گؤمۆلدۆ یئر آلتینا منم ـ منم دئیه‌نلر،
کی، اونلاردان بو دۆنیادا بیرجه آد ـ سان قالمادی.
تورپاق آلتدا یاتانلارا بیر دقّتله نظر سال،
تورپاق یئدی، سۆمۆگۆندن بئله نیشان قالمادی.
یاخشی آددیر نوشیروان ی بو دۆنیادا یاشادان،
لاکین، کؤچدۆ بو دۆنیادان نوشیروان، قالمادی.
ای فیلان کس! خئیرخواه اول، بیل حیاتی غنیمت،
نه قده‌ر کی، دئمه‌‌میشلر:« فیلان ـ فیلان قالمادی!»
حاضیرلایان: ائلدار م. صدیق
ناغیل ائدیرلر کی، بیر پادشاه بیر اسیرین اؤلدۆرۆلمه‌سینه امر ائتمیشدی، یازیق اسیرین امیدی کسیلدیکده، آغزینا گله‌نی دئییب پادشاها سؤیۆشلر یاغدیرماغا باشلادی. مثل وار دئیه‌رلر: جانیندان ال چکه‌ن آغزینا گلنی دئمکدن قورخماز!
بئیت
یوخسا برک آیاقدا قاچماغا ایمکان،
کسه‌رلی قیلینجی قارمالار اینسان.
شئعر
آچار دیل، قورخماز عالمده.
هجوم ائیلر ایته بیرد‌ن،
پیشیک مغلوب اولان دمده.
بسم الله الرحمن الرحیم