بایاتی بولاغی
مرحوم جمشید شیبانی
سؤزلرین بالدیر سنین،
اؤرپڲین والدیر سنین،
گۆل اندامین بوللوردیر،
یایلیغین آلدیر سنین.
آراز آخیر آرادان،
جۏشوب گلیر هارادان،
نغمه‌سینه قولاق وئر،
قاندیر، آخیر یارادان.
آغلارام آرازدا من،
درینده ـ دایاز دا من،
دایانساز داغلار کیمی،
قالارام آرازدا من.
صبریمی کسمه گلین،
سۆیۆد تک اسمه گلین،
چکیبسن قاش کیرپیڲه،
سۆرمه ایله وسمه گلین.
لاله‌وین شامی سۏنسون،
باده‌وین جامی چئونسون،
یامان گۆنده دۏست آشنان،
داغیلسین هامی دؤنسۆن.
یۏلا دۆشدۆ اۏ باشدان،
باشین یاردی اۏباشدان،
بئیله کی قان فیشیلدیر،
دای باش چیخماز اۏ باشدان.
اۏلما آرالی مندن،
چیخاق دوماندان ـ چندن،
مندن آیری دۏلانسان،
قلبیم قارالی سندن.
باغدا یاتانا قوربان،
قاش گؤز آتانا قوربان،
بیر گئجه‌لیک آی کیمی،
چیخیب باتانا قوربان.
مردین ایزینه قوربان،
اۏ آغ اۆزۆنه قوربان،
ظالیملرین اؤنۆنده،
چؤکمز دیزینه قوربان.
مکتوب یازانا قوربان،
یازیب پۏزانا قوربان،
سیمللری دیللندیرن،
عاشیق، اوزانا قوربان.
آچ گؤزۆن آنا قوربان،
سنسن بیر دانا قوربان،
قۏی دۏلانیم باشینا،
اۏلوم پروانا قوربان.
سازی چالانا قوربان،
جانی آلانا قوربان،
منیم بو دلی کؤنلۆم،
گئدیر تالانا قوربان.
آرتسین جلالین گلین،
کؤچسۆن ملالین گلین،
آنادان امدیڲین سۆد،
اۏلسون حلالین گلین.
اۆزۆ لالالی گلین،
الی خینالی گلین،
بیر باخیشدا ایڲیددن،
یقین جان آلی گلین.
تؤکۆلۆن هایا گلین،
چیممه‌گه چایا گلین،
یار سودا آیا باخیر،
آی باخیر آیا گلین.
بسم الله الرحمن الرحیم