تورک بایاتیلاری - 4 (فولکلوروموزدان)
اخلاق و حکمت
مردليك ـ نامردليك
(1)
ايراقدا،
شعله وئرر چيراق دا.
مرده اجل توش گلدي،
نامرد قالدي ايراقدا.
(2)
من عاشيقم، آي آغا،
پيلته يانار آ..ياغا.
مرد سؤزون اوزه سؤيلر،
هئچ ياپيشماز آياغا.
(3)
كمان بلا، اوخ بلا،
ائل گلهسي يوخ بلا.
نامردله دوست اولانين،
باشي چكر چوخ بلا.
(4)
عزيزيم، قيزيل آلما،
سوفرهيه دوزول آلما.
نامرد گليب مرد اولماز،
بويونجا قيزيل آلما.
(9)
سولار گلر، گؤل دولار،
شاختا وورار، گول سولار.
مرد ايگيدين بالاسي،
اؤزو كيمي مرد اولار.
(10)
يوز يالوار،
يوز ديل چيخار، يوز يالوار.
نامرد بيلديگين ائيلر،
يوز آغيز آچ، يوز يالوار.
(11)
عزيزييم، يوز يالوار،
يوز بلد وار، يوز يول وار.
نامردده سخا اولماز،
يوز اتكله، يوز يالوار.
(12)
بو باده دولسا نه وار،
بوشالسا، دولسا نه وار.
بير مرد خسته دوشونجه،
يوز نامرد اؤلسه نه وار.
(13)
عاشيق باريدان گئچر،
گلر ياريدان گئچر.
نامردله دوست اولانين،
عؤمرو ياريدان گئچر.
(19)
عزيزييم، باش اگر،
بارلی بوداق باش اگر.
دنیا نامرد دنیا دير،
مرد، نامرده باش اگر.
(20)
عزيزيم، انر گلر،
داغلاردان انر گلر.
نامرده توش اولانين،
باشينا نلر گلر.
(21)
قوزولار ملر گلر،
آرخاجا انر گلر.
ايشين نامرده دوشسه،
باشينا نلر گلر.
(22)
عزيزيم، نر ده گلر،
دولانار نر ده گلر.
نامرده خطر يئتمز،
نه گلسه مرده گلر.
(23)
من عاشيق، قارا تئللر،
آغ اوزده قارا تئللر.
نامرده سّرداش اولسان،
قلبيني غارت ائيلر.
(29)
من عاشيق، كماني دير،
قاش، گؤزون كماني دير.
مردلر باش آلدي گئتدي،
نامردلر زماني دير.
(30)
بو گليشده يار گلير،
گؤيدن يئره قار گلير.
نامرده آرخا دورماق،
مرد ايگيده عار گلير.
(31)
قاراچيقدا قار اولماز،
غونچاسيندا خار اولماز.
مردلره جان - صاداغا،
نامردده ايلقار اولماز.
(32)
اوهليكدن چاي اولماز،
بيوفادان هاي اولماز.
آتالار ياخشي دئييب،
نامرد مرده تاي اولماز.
(33)
من عاشيق كاساد اولماز،
مرد الي كاساد اولماز.
يوز نامردين چؤرگين،
دوغراسان كاسا، دولماز.
(39)
گولون در، اك اوجوندان،
قليانين چك اوجوندان.
نامرده توش اولوبسان،
بلالار چك اوجوندان.
(40)
عزيزيم، بو داغيندان،
گول سينار بوداغيندان.
مردين طؤولهسي ياخشي،
نامردين اوتاغيندان.
(41)
داغلارين هاراييندان،
ائل كؤچدو هاراييندان.
مردين داخماسي ياخشي،
نامردين ساراييندان.
(42)
عزيزيم، گئچدي مندن،
اوخ دگدي، گئچدي مندن.
مردلره كؤرپو اولدوم،
نامردلر گئچدي مندن.
(43)
چراغين هيس اوزوندن،
ياغ دامار هيس اوزوندن.
باش گؤتوروب قاچارام،
نامردين پيس اوزوندن.
(49)
عزيزيم، مؤو دوگونو،
زوغ آتار مؤو دوگونو.
نامردين پئشهسي دير،
مرد دئمز گؤردوگونو.
(50)
عزيزيم، گؤردو، گونو،
سينهمده گؤر، دوگونو.
نامردده سؤز اگلنمز،
مرد دئمز گؤردوگونو
(51)
عاشيقم، يارا منده،
دئمرم يارا من ده.
نامرد مرهم گزديرير،
قوور ائدير يارا منده.
(52)
عزيزيم، دردي منده،
زمانين دردي منده.
نامرد آغاسي اولمام،
قول اوللام دردمنده.
(53)
گؤرونور گؤزه «تكله»،
هر درده دؤزه « تكله».
نامردين رحمي اولماز،
يوز يالوار، يوز اتكله.
(59)
داغلارين سينه سينه،
قار ياغيب سينه سينه.
مردين گوللـهسي دگسين،
نامردين سينه سينه.
(60)
بولوتدان شيمشك چاخدي،
باخيرديم گؤزوم آخدي.
بير دفعه ال توتدوغوم،
نامرد باشيما قالخدي.
(61)
عزيزيم، باد آپاردي،
يئل اسدي، باد آپاردي.
نامرد بير ايش ايشلدي،
من سئوديم ياد آپاردي.
(62 )
عاشیق، وارثه قالدی،
یاریم وارایسه، قالدی.
نامرد ییغدی، یئمدی،
اؤلدو وارثه قالدی.
(63)
عزيزييم، نه قال دي؟
نه غوغادي؟ نه قال دي؟
مرد ايگيددن شان ـ شهرت،
بس نامرددن نه قالدي.
(69)
عزيزيم، مرده ساري،
آز قاليب مرد اثري.
نامرد دؤشومدن وورسا،
سورونّم مرده ساري.
(70)
«شيروان»ين دوز حاصاري،
يوللاردان اوز حاصاري.
مردين آغاج كؤلگهسي.
نامردين يوز حاصاري.
(71)
داغ دؤشو قالا يئري،
بورج يئري، قالا يئري.
نامردلره يئر ائيلر،
مردلرين قالا يئري.
(72)
عزيزيم، آدام يئري،
باشين آل، آدام يئري.
دنياني نامرد آليب،
قالماييب آدام يئري.
(73)
ائلهمي، مرد آتاسي،
دولدور وئر مرده، طاسي.
نامرد گليب مرد اولماز،
اولماسا مرد آتاسي.
(79)
ناخيردي مي؟
سارالان تاخيلدي مي؟
نامرده اسير ايگيد،
دئ يولون ياخيندي مي؟
(80)
عزيزيم، آتا مني،
كور، آنا، آتا، مني.
دگمهيه نامرد الي،
مرد اودا آتا مني.
(81)
خستهيم سيخما مني،
تك بيليب، ييخما مني.
مرد كيمي دوستلوق ائديب،
نامرد تك ييخما مني.
(82)
او كيمدير؟ آتار مني؟
هر درده قاتار مني؟
نامرد گليب مرد اولماز،
دوستلوقدا ساتار مني.
(83)
آپاردي آتش مني،
كور ائلهدي ياش مني.
بو يامان يئرده قويدو،
نامرد بير يولداش مني.
(89)
يانديريب ياخدي مني،
داغ - داشا چاخدي مني.
مرد بيليب آرخالانديم،
نامرد تك ييخدي مني.
(90)
برهده سيني - سيني،
گؤزل اوو سينهسيني.
مرده قول اول، گؤزلمه،
نامردين سينيسيني.
بسم الله الرحمن الرحیم