تورک بایاتیلاری - 3 (فولکلوروموزدان)
اخلاق و حکمت
اؤگودلمه‌لر
(5)
من عاشيقم، يولوندا،
يول اركانين يولوندا.
جيزيغيندان چيخانين،
ساققاليني يول اوندا.
(6)
«آلاداغ»- ين باشيندا،
سو وار هر بير داشيندا.
سن اؤزونه دوست قازان،
دوشمن اوجاق باشيندا.
(7)
داغلار باتيبدير قارا،
اووچو دوشوبدور دارا.
ديل ايله دوست اولانين،
قلبيني داردا آرا.
(8)
قوهوم هارا، ياد هارا،
بئل باغلاما اغيارا.
قونشون حياسيز چيخسا،
تئز كؤچ جانين قورتارا.
(14)
عزيزي‌يم، يار ساخلا،
بوخاغيندا خال ساخلا،
دوشمن گليب دوست اولماز،
دوستلاريني ساز ساخلا.
(15)
عزيزي‌يم، باغلاما،
دوست اليني باغلاما،
خاينه حؤرمت ائتمه،
دوشمنه بئل باغلاما.
(16)
آغزين آچما،
يارامين آغزين آچما،
اؤزون بيلمز كيمسه‌نين،
هر يئرده آغزين آچما.
(17)
خنجرین باغی قاسما،
تسمه دن قویون آسما.
دوشمن دیلی چوخ اولار،
هر سؤزه قولاق آسما.
(18)
خلقین پیسین دانیشما،
پیس دئمگه چالیشما.
اؤز پیسینه عارف اول،
اؤزگنکینه آلیشما.
(24)
من عاشيقم، نوو آيا،
«نظامي» دن «نوايا».
ائله يار سئوگينن كي،
نه درده دوش، نه وايا.
(25)
عزیزی یم، سلامت،
آت اوخونو سلامت.
تکبر اولماگیلن،
هر یئتنه سلام ائت.
(26)
عزیزی یم، سلامت،
آت اوخونو سلامت.
دوشمه دیلین اودونا،
سرین اولسون سلامت.
(27)
صرّاف كيمي سؤزو سئچ،
پيسه محل قويما هئچ.
سايانا حؤرمت ائيله،
سايماياني سايما هئچ.
(28)
ائله‌مي اؤزونه باخ،
اولولار سؤزونه باخ،
اگيليب سوايچمه‌ميش،
بولاغين گؤزونه باخ.
(34)
عزيزي‌يم، تئز سينار،
نازيك بوداق تئز سينار.
سئون قلبه توخونما،
او اينجه دير تئز سينار.
(35)
نه دورموسان «يافت»- ا وار،
ايپك، اطلس، تافتا وار.
دنيا منيم دير دئمه،
آرادا انصاف دا وار.
(36)
من عاشيق، سؤز يئري وار،
اوزونده گؤز يئري وار.
مجلسده يئرين تاني،
هر كسين اؤز يئري وار.
(37)
يارين آغ سينه‌سي وار،
قولاقدا تاناسي وار.
كنار اولون قانمازدان،
دالينجا طعنه‌سي وار.
(38)
سينه‌مده نار باغي وار،
يئدّي يئردن داغي وار.
دول كيشييه گئتمه‌يين،
بير گون آغلاماغي وار.
(44)
سو گلر داشا دگر،
كيرپيكلر قاشا دگر.
ائتمه پيسليك، آجيليق،
بير گون باش، باشا دگر.
(45)
گؤزه دگر،
گوموش ميل گؤزه دگر.
دوستوم مخنّث اولما،
لابد اوز، اوزه دگر.
(46)
آراز آخار، کور گؤزلر،
قفله یولون کور گؤزلر.
آل گئییب سئیره چیخما،
سنی درر کور گؤزلر.
(47)
عزيزي‌يم، مين اللر،
مين آياقلار، مين اللر.
هئچ كسه بويون اگمه،
سن اگديكجه مينللر.
(48)
اوزه گولر،
هر زمان اوزه گولر.
او كيمسه‌يه آلدانما،
يالاندان اوزه گولر.
(54)
قویون مله ین اولور،
سودو گله ین اولور.
هئچ یارا بئل باغلاما،
سندن دؤنه ین اولور.
(55)
پايام وار دميردن دير،
مايام وار خميردن دير.
گلن گونه ياخشي باخ،
گئدن گون عؤموردن دير.
(56)
عاشيق وفا نه بيلر،
سئير، صفا نه بيلر.
اغياردان وفا اولماز،
اغيار وفا نه بيلر.
(57)
لـله اؤلدو، بئز گتیر،
آرشین آپار تئز گتیر.
نه قونشودان سؤز آپار،
نه قونشودان سؤز گتیر.
(58)
عزيزي‌يم، نيمه دير،
مناره جمجمه دير.
ياخشيليقدان خئير آپار،
دنيا اوزون جمعه دير.
(64)
عزيزي‌يم، گوون گز،
داغدا بيتر گوون، گز.
نه دؤولته، نه مالا،
بير آللاها گوون گز.
(65)
عاشيق سؤزون بيتيرمز،
ياخشي سؤزون ايتيرمز.
گيزلن يامان گؤزلردن،
باخار، گؤزو گؤتورمز.
(66)
داروازادان باخما، قيز،
ساچينا گول تاخما، قيز.
هر سئويرم دئينه،
سولار كيمي آخما قيز.
(67)
عزيزي‌يم گؤزل آل،
اودو آختار كؤزل آل.
جمالدان گؤزل اولماز،
كمال آختار گؤزل آل.
(68)
دوشندن آل،
ييخيليب دوشندن آل.
بير دردين درمانيني،
او درده دوشندن آل.
(74)
شيتيل دير گوران دگيل،
بيتيبدير بوراندا گول.
دوستو گؤرنده آغلا،
دوشمني گؤرنده گول.
(75)
من عاشیقم، یئنه گول ،
ال چال ، اوینا، یئنه گول.
دنیاجا غمین اولسا،
دوشمن گؤرسن یئنه گول.
(76)
هئي دئييرسن بيكسم،
آرخاسيزام، بيكسم.
آز دئنه بير كسيم يوخ،
دئ‌من أوزوم بير كسم.
(77)
دّر اوردان
ياقوت اوردان، دّر اوردان.
مجلسده يئرين تاني،
دئمسينلر، دور اوردان.
(78)
اينجي بوردان، دّر بوردان،
مين آتيني سور بوردان.
مجلسده يئرين تاني،
دئمسينلر دور بوردان.
(84)
خلقه دايان،
چراغ اول خلقه ده، يان.
خلقدن اومود كسيلمز،
ائركك سن خلقه دايان.
(85)
ايشيني آل اله سن،
عؤمرو وئرمه يئله سن.
هر ايشده صبيرلي اول،
پئشمان اولار تله‌سن.
(86)
عزيزي‌يم، مردي سن،
آرا، آختار مردي سن.
آغلاما ياد ائوينده،
تاپدالا گئچ دردي سن.
(87)
پاپروزو چکمه گینن،
قوطونو اگمه گینن.
آی دوستوم ، گل یاخینا،
یاندیریب تؤکمه گینن .
(88)
دوست گرك يانان اولسون،
هر دردي قانان اولسون.
دوست تاپسان، ائله سين‌تاپ،
ساييلان، سانان اولسون.
(94)
عزيزيم آرا سؤزو،
صرّاف اول، آرا سؤزو.
هر سؤزه قولاق وئرمه،
ائو ييخار آرا سؤزو.
(95)
من عاشيق، يادا وئرمه،
عؤمرونو بادا وئرمه.
قيز وئردين، آداما وئر.
دؤولته، آدا وئرمه.
(96)
عزيزي‌يم ديوانه،
يادا سالما بيگانه.
دوشمنين حورو اولسا،
جنّتي قوي ويرانه.
(97)
درديني دئ بيلنه،
ايش باشينا گلنه.
سرّيني دئمه گولوم،
هر اوزونه گولنه.
(98)
بو يولدان ايكي قاتي،
فايتونچو سورر آتي.
قورو گؤز ببگي تك،
دوست وئرن آماناتي.
(104)
من عاشيقم، داش ـ داشي،
چاخماق دؤگر داش ـ داشي.
قانمازلا يولداش اولما،
قانان ايله داش داشي.
(105)
«برگشاد» ياد آغالي،
ياد بگ‌لي، ياد آغالي.
يئ مالين، سور دؤورانين،
يئمه‌سن يادا قالي.
(106)
بو يئرلر آي آغالي،
ايچي بگ‌لي، آغالي.
دوشگون دوشمه، ائل ـ عالم،
اوستونه آياق آلي.
(107)
عزيزيم، ائله قالي،
ائل مالي، ائله قالي.
مالين يئمه‌ين خسيس،
يئمه‌سن، ائله قالي.
(108)
عزيزيم، ائله قالي،
ائل مالي، ائله قالي.
وارين يئ لذت ائيله،
يئمه سن ائله قالي
(111)
عزيزيم، آياغيني،
دوغرو آت آياغيني.
يورغانيندان چيخارما،
كسرلر آياغيني.
(112)
اسكي سيني،
يئنگي قاب، اسكي سيني.
بابانين يولونو توت،
سئو دوستون اسكيسيني.
بسم الله الرحمن الرحیم