تذکره شیخ صفی الدین اردبیلی، محمد نشاطی شئرازی
حاضیرلایان: داود بهلولی
حضرت شيخ صدرالدين روح الله روحه دئدي كيم حضرت شيخ قدس الله سره طلبده سراسيمه اولوب مزارلار ايله بوجاقلاردا اوتوران كيشيلرين چئوره‌سينده گزردي و چون خلوتده اوتورميش اولا ايدي، گورردي كيم ناگاه ديواردان بير كيمسه چيخاردي و يا يئردن باش چيخاريب يوخاري گليردي يا اوستوراغدان يئره انردي و صحبت ائيلردي و گئنه اؤز يوللارينا واريب قاييديرلاردي و حضرت شيخ اؤز احوالي ايله واقعه‌لري آنلارا عرض ائدردي و هئچ هانغيسي فهم ائيله‌مزدي كيم اول نه حال‌دير.
بير گون حضرت شيخ اوتورور ايكن گؤردو كيم محرابين ديواري ياريليب بير كيمسه چيخيب حضرت شيخه قدس سره خطاب ائتدي كيم: «اي تورك پيري!» و اول چاغ شيخه تورك پيري دئيرلردي، زيرا كيم رحمتلي آتاسي حسن و كمال ايلن غايتده ايدي. چون حضرت شيخ بو خطاب آندان ائشيتدي، آنا متوجه اولوب قولاغي آنين كلماتي ايله خطابينا آسدي. ديواردان چيخان كيشي دئدي: «يئري آماده اول كيم اوچ گوندن سونرا ايكيندي نامازينا يئتمه‌ييب بلكه گون‌اورتانين نامازي چاغي دنيادان كؤچوب آخرته واراجاقسان.»
بو سؤزي دئييب ساعتده يوزونو گيزلتدي. حضرت شيخ قدس الله سره بو سؤزو ائشيدينجه چوخ حيفلر يئدي و نوميدليك رقمي اميدليك صفحه‌سينه چكدي، اما يوق عاريت عمري ايچون و ضرورت اجلي اؤترو بلكه مرشده يئتمه‌دن و مقصودو حاصل اولمادان عالمدن وارديغي ايچون. پس ناچار ايلن كؤنلو اؤلمگينه و تسليم باشي حسرت ديزي اوستونه قويدو.
نظم
دئديم شراب وصل ايله سيراب اولاييم
كويي باشينه وصلي مراديمجا بولاييم
كئچيرمه‌ديم خياليما هرگز كي سونوجو
مقصوده يئتمه‌دن غم و حسرتله اولاييم
پس غسل ايله طهارت آليب اوروجون آچماييب اؤلومون انتظاريندا اوتوروب اوچونجو گونه كي رحلت چاغي اولاجاق وعده‌دير گونه اورتانين وقتينه‌دك منتظر اوتوردو. ناگاه بير كيشي هم بئله ديواردان دئدي: «اي عبادتلي تورك پيري! نيشون ملول خاطر اوتوروبسان و كؤنلون نه‌دن اؤترو مشغول‌دور؟» حضرت شيخ قدس الله سره بويوردو: «بير كيشي اوچ گون موندان ايلري ديواردان چيخيب منيم اؤلومون خبرين وئردي. ايمدي دئديگينه مهيا اولوبام كيم قاچان تانري امري يئتيشيب جانين امانتي اييه‌سينه تاپشيراييم.» چيخان كيشي دئدي: «قايغي يئمه‌ييب قالخ كيم اول سؤزو سؤيله‌ين كيشي‌نين جنازه‌سينه واريب آنا ناماز قيلاليم كيم اول دنيادان رحلت ائيله‌ييبدير.» حضرت شيخ قالخيب چون آنينلان كويونون باشينا وارديلار، جنازه‌سي اؤتر گؤردولر و حال اول كيم بو اؤلموش كيشي، اوليالارين مشهورلاريندان ايدي. چون آنا ناماز قيلديلار، حضرت شيخ يولداشيندان خبر سوردو كيم «بو نه حال ايدي كيم اول كيشي منيم اؤلومنون خبرين وئردي و اؤزو اؤلدو؟» جواب وئردي كيم «اول كيشي «المؤمن مرآه المؤمن»ين حكمو ايلن چون سنين كؤنلون گوزگوسونه باخدي، كندينين صورتين گؤردو و موتا ياخين معلوم ائتدي. ساغيندي كيم سنين اجلين‌دير و حال اول كيم كندينين ايميش.»
بيت
جام جهان‌نمايا باخان يوزونو گؤرور
غيرين يوزو خيال ائدر اما اؤزو دورور
بسم الله الرحمن الرحیم