حاضیرلایان: داود بهلولی

شیخ صفی - روّح الله روحه- دئدي كيم بير گون قوّاللار حضرت شيخ زاهدين صحبتينده نسته اوخوردولار و آنلار ايچون بير نسته گرك ايدي. طالبلر هر بيري بير نسته وئريرديلر. شيخ صفي‌الدين قدس الله سره‌نون خاطرينده كئچردي كي «چون منده هئچ نسته يوخدور وئرمك، و شيخ زاهدين كؤنلونده معلوم‌دور، اگر نسته وئرمه‌سم بير آشاغيليق اولا.» ناگاه شيخ زاهد قدس الله آنا باخيب دئدي: «طالب عاشق دئيير نسته بيلمجه يوخدور قوّالا وئرمك؛ بلي اگر الينده نسته يوخدور، جزوي نسته اؤزگه طالبلردن بورج ايلن آلماق اولور كيم وئره‌سن.» سونرا اؤزونه ائله مقرر ائيله‌دي كيم اول وقت كيم قوّاللارا نسته وئرمه‌لي ايديلر، حضرت شيخ اؤزگه‌لردن بورج آليب ايثار ائدردي و هر بير نئچه مدت‌ده آناسينا پيغام ائدردي كيم «بو قدر بورجوم وار.» مطهره آناسي آنين بورجلارينين عوضين گؤندريردي تا حضرت شيخ قدس الله سره اؤدَردي.

پس چون حضرت شيخ زاهد قدس الله روحه شيخ صفي‌الدينين قدس الله قاتي رياضتلرين مشاهده قيلدي، ايستردي كيم آني اول قاتيليغدان آهسته آهسته انديره. هميشه آني يانينا چاغيريب اوروجون آچديريردي و شيخ صفي‌الدين قدس الله سره بير لقمه پولاو ائيله كيم گيلانين رسمي‌دير آووجو ايچينده سيخاردي تا بير بارماغ قدرينجه اولوردو و مبارك ديليني دوزا دگديريب دوزلو ائدردي. سونرا اول لقمه‌ني آغزينا قوياردي. و وقت اولوردو كيم دؤرد آي ـ بئش آي حيوانليغ يئمزدي و قاچان كيم يئر قارلي اولا ايدي، قاري يئرين اوستوندن گئدريردي و تُربون اينجيگه ياپراقلاري كيم قارين آلتيندا ايدي گؤتورب پولاو ايلن نوش جان ائدردي.

بيت

هانغي قوش كيم شاه اليندن طعمه(ني) نوش ائيله‌يه         دنيي دون دانه‌سي جمله فراموش ائيليه

آندان حضرت شيخ زاهد قدس الله روحه مصلحت بئله گؤردو كيم شيخ صفي‌الدينه قدس الله سره حيوانليغ اتي وئره. پس تدريج ايلن آنا بويوردو كيم موندان سونرا ات يئگيل. و اوّل بويوردو كيم حضوروندا بير تاووقي سؤكولمه ائيله‌ديلر و آندان بير قانات شيخ صفي‌الدينه يئديردي. ايكينجي قاتلا ايكي قانات، اوچونجو تاووقون بير بودو و بئله هر گون بير پاره آرتيريردي تا حيوانليغ يئمگه آنا عادت ائيله‌دي. و مشايخين بير حكمتي وار كي چون سالكين حالينا باخالار، آني رياضت ايله مجاهدت بويورورلار. و همان كيم گؤردولر كيم رياضتده كامل اولدولار، رياضتدن منع ائدرلر كيم آنلارين حاليندا ترقي اولا. پس شيخ زاهد قدس الله روحه بو حالتده شيخ صفي‌الدينين قدس الله سره حالتي، رياضتي ترك ائتمكده گؤردو.

بيت

چون كؤنولنون باجه‌سيندن نفسينين توتونلوگو         

گئدره‌سن كؤنلون ايچي جمله نوراني اولور