حبیب ساهردن بیر شعر
شعرین سسی
گۆن باتارکن، قیزیللانان چایلاردا،
گۆل آچاردی یازین گؤزل آخشامی،
اوزاداردی منه، شعرین پریسی،
شراب ایله دولو آلتین بیر جامی...
***
من مست ایکن تارلالاردا دویاردیم:
بؤجکلرین عاشیقانه نغمهسین...
ائشیدردیم همده، یاشیل درهدن،
مئشهلردن آخیب گئدن سو سسین...
***
بۆرۆنرکن یوللار، ناخیر کئچنده،
تۆرۆنج رنگلی، بولودلانان، توزلارا،
ناخیر یولدان اؤتۆب، توزلار یاتارکن
چمنلیکده - راست گلردیم قیزلارا...
***
او قیزلارین ان عیشوهلی، گؤزلی،
اوزاداردی منه بیر داغ چیچه گی...
من او گۆلۆ بیر ساخسیدا ساخلاردیم:
اولسون دئیه، اوتاغیمین بزه گی...
***
آی دوغارکن، کؤلگهلنمیش سولاردا،
آیین گۆمۆش ایشیقلاری تیترردی...
داغ چیچه گی وئرن، نازلی قیز منه،
شراب ایله دولو، بیر جام وئرردی...
***
من، مست ایکن، او دیلبرین سسینده،
شعرین مرموز، درین سسین دویاردیم!
او یاتارکن عشقین سؤنمز رنگیله،
شعرین ایپک پردهلرین بویاردیم...
لیریک شعرلر
بسم الله الرحمن الرحیم