تذکره شیخ صفی الدین اردبیلی، محمد نشاطی شئرازی
حاضیرلایان: داود بهلولی
حكايت
سراولي خواجه عبدالملك دئدي بير قاتلا حضرت شيخ صفي‌الدين قدس الله سره شيخ زاهد ايلن گيلانين مئشه‌لرينه گئدرلردي. حضرت شيخ زاهد قدس الله سره آتلي ايدي و آنلار ياياغ. خواجه افضل يئنگي يئتيشميش بير ييگيت ايدي و هزه يوزو صفحه‌سينده ريحانلار باش چيخارماميشدي. ناماز چاغي اولدو. حضرت شيخ زاهد آتدان انيب دئدي: «اوغول، صفي‌الدين! آتيمي ساخلا تا من نامازيمي قيلاييم.» حضرت شيخ صفي‌الدين كندي پيرينين آتين دوتوب دوردو. چون شيخ زاهد نامازدا ايدي، حضرت شيخ صفي‌الدين آتين يوكَني خواجه افضلين الينه وئريب شيخ زاهدين آردينا دوروب نامازا مشغول اولدو. خواجه افضل اؤزونه دئدي: «منده داخي طهارت وار؛ آنلارا اقتدا ائيله‌ييم.» پس آتين جيلوويني بير آغاجا باغلاييب نامازا دوردو. قضادان بير اوغرو پوسودان چيخيب آتي اوغورلادي. چون نامازدان فارغ اولدولار، شيخ زاهد دئدي: «اوغول، صفي‌الدين! آت قاني؟» حضرت شيخ صفي‌الدين، خواجه افضله دئدي: «آتي نئيله‌دين؟» دئدي: «آغاجا باغلاديم، اوغورلاييبديرلار.» شيخ زاهد دئدي: «آتي اوغورلاديلار و سن نامازيني كسمه‌دين؟» خواجه افضل دئدي: «يوق.» شيخ زاهد قدس الله روحه دئدي: «زهي خواجه افضل، زهي خواجه افضل.» بو خواجه‌ليگي آندان بري آنا مقرر اولدو. ناگاه اوغرويو گؤردولر كيم كفنين بوينونا بيراخيب آت ايلن گلور. همان كيم يئتدي، خواجه افضلين آياغينا دوشدو. خواجه افضل دئدي: «شيخ اول‌دور.» و اؤزونو گئري‌يه چكردي. اوغرو دئدي: «بلي، آني شيخ اولدوغونو بيليرم اما سن منيم يولومو دوتوب گاه دنيز اؤگومه گتيريردين و گاه قيليج ايله اوخ مانا چكردين و يئريمگه مجال وئرمز ايدين. ضرورتآ قاييتديم و آتي گئري گتيرديم.»
بيت
چون گونشنين نورو گوزگو يوزونو آيدين ائده گوزگو داخ يئرين يوزو پر زيب و پر آيين ائده
بسم الله الرحمن الرحیم