نسیمی دن بیر غزل
ترک ائیلهمز جان عشقینی، گر مین کز آنی یاخاسان،
هجرینده لاییق گؤرمه کیم، هر دم بو جانی یاخاسان.
ای ایستهین دیدارینی موسا کیمی معشوقهنین،
واجیب بودور عشقینده کیم جان و جهانی یاخاسان.
آخر زمانین فیتنهسی! بُرقع جمالیندان گؤتۆر،
تا عشقه اۆزهرلیک کیمی، پیر و جوانی یاخاسان.
ای عشقه منکر مدّعی! گیر عاشیقین توحیدینه،
تا سربه سر ایچیندهکی شرک و گۆمانی یاخاسان.
آنَسْتُ نارین سیررینی فاش ائیله شمعیندن یۆزۆن،
تا نورونا پروانه تک، کون و مکانی یاخاسان.
ای قیمت عشقین گؤهر، کؤنلۆمدۆر آنین معدنی،
چۆن کان گرهکدیر گوهره، نئچۆن بو کانی یاخاسان؟
نام و نشانی شهرتین، آفتدیر اهل عشقه چۆن،
وار، ای كؤنۆل! جهد ائیله کیم نام و نشانی یاخاسان!
جانیما عشقین اؤدو چۆن کار ائیلهدی، یاخدی تمام،
شیمدی گرکدیر غالبا، باغریمدا قانی یاخاسان.
ای آخیدان دۆردانهیی کیپریکلریندن دم به دم،
عئینیمده اوندان قورخورام، آب روانی یاخاسان.
ای لاته تاپان بی بصر، گل گؤز بو ماهین صورتین،
تا لات و عزّا باشینا دِیرِ موغانی یاخاسان.
چاخدی نسیمینین دیلی اللّهْ نورونون سیررینه،
ای نار قدسی هارداسان تا اول زبانی یاخاسان؟
بسم الله الرحمن الرحیم